ავტორი: nuca galumashvili

ალბათ, ერთხელ მაინც ყველასთვის უთქვამთ – „მიჰყევი საკუთარ ინსტიქტებს“. იტალიაში დაბადებულ მელანია ბეტისტონს დედისგან მუდმივად ესმოდა ეს სიტყვები. სწორედ, ამიტომ ენდო თავის ინსტიქტებს და მარკეტინგის შესწავლის შემდეგ შეიცვალა პროფესია WSET-ის (Wine & Spirit Education Trust) მიმართულებით და სომელიეს სამაგისტრო პროგრამაზე გადავიდა.

ახლა ის უკვე უფროსი სომელიეაა, უფრო მეტიც მან 2022 წელს გაიმარჯვა ახალგაზრდა სომელიეების კონკურსში და დიდ ბრიტანეთში „ჰარპერის“ ტოპ 25 სომელიიათა რიგში ადგილი დაიკავა.

მელანია წელს IWSC Wine Judging in Georgia 2024 – ღვინის საერთაშორისო კონკურსში ჟიურის წევრია, რომელიც 2023 წლის 28-30 ნოემბერს კახეთში გაიმართება, საზეიმო დაჯილდოებას კი საქართველო 1 დეკემბერს უმასპინძლებს.

 

მელანია, თქვენი უნიკალური გამოცდილების ნაწილია ტრადიციული და თანამედროვე ელემენტებით დამზადებული ღვინოების დეგუსტაცია. განსაკუთრებით რის აღმოჩენას ელით განსაკუთრებით IWSC Wine Judging in Georgia კონკურსზე წარდგენილ ღვინოებში?

მსურს ვიპოვო საქართველოს განსაკუთრებული გემო, მოუთმენლად ველი მის აღმოჩენას. ღვინის ინდუსტრიის ბუნებრივმა განვითარებამ და მისმა ისტორიამ ქართულ ღვინოს გარკვეული სტატუსი მიანიჭა, თუმცა, მაინტერესებს, დარჩება თუ არა ის ავთენტურობისა და ძირძველი მემკვიდრეობის ჩარჩოებში, თუ უარს იტყვის თავის უნიკალურ მახასიათებლებზე კომერციული მოთხოვნების დასაკმაყოფილებლად.

 

თქვენი კარიერული თავგადასავალი, ცხოვრებისეული გატაცებისკენ სწრაფვა და მარკეტინგიდან ღვინის ინდუსტრიაში გადასვლა, ნამდვილად შთამაგონებელია. როგორ აისახება თქვენი გამოცდილება მარკეტინგის სფეროში თქვენს ამჟამინდელ პროფესიაზე, როგორც მთავარი სომელიე, ღვინის ბაიერი და ახლა, როგორც IWSC Wine Judging-ის მსაჯი?

ვცდილობ ჩემი ძველი პროფესია გამოვიყენო მეღვინეობის სფეროში. გაგიკვირდებათ, მაგრამ ამ ინდუსტრიაში მარკეტინგი ხელახლა აღმოვაჩინე. კომუნიკაციას აქვს და ყოველთვის ექნება ყველაზე დიდი გავლენა, როდესაც საქმე ბრენდს ან, ზოგადად, რეგიონს ეხება.

სიტყვებს „საქართველო ღვინის სამშობლოა“ რაღაც განსხვავებული, ღრმა გაგება და ეფექტი აქვს. მაგრამ, ვფიქრობ, რომ საქართველოს ასეთი პოზიციონირება ნელ-ნელა მოძველდა, სწორედ ამიტომ ჩამოვდივარ საქართველოში, რათა გადავფურცლო ამ ძირძველი ისტორიის „ახალი ფურცლები“.

 

2022 წელი თქვენთვის საკმაოდ მნიშვნელოვანი წელი იყო. რადგან ახალგაზრდა სომელიეების კონკურსში გაიმარჯვეთ და გაერთიანებული სამეფოში ჰარპერის 25 საუკეთესო სომელიათა რიგში მოხვდით. რა რჩევებს მისცემდით ახალგაზრდა სომელიეებს, რომლებიც ისწრაფვიან ასეთივე მომავლისკენ?

მე მჯერა, რომ ჯილდო სულაც არ განსაზღვრავს პროფესიონალიზმს, განსაკუთრებით როცა საქმე ღვინოს ეხება. კონკურსები მხოლოდ აისბერგის მწვერვალია, რასაც ფართო საზოგადოება ხედავს. მთავარი სამუშაო გამოცდილება ბევრად ღრმად  ფესვებში ჩადის.

იმისთვის, რომ გახდეთ გამოცდილი ღვინის მსაჯი, რა თქმა უნდა, უნდა იცოდეთ ყურძნის ჯიშების გარჩევა და წარმოშობა, რაც ნიშნავს, რომ უნდა იშრომოთ, დასვათ კითხვები, იმსჯელოთ თანატოლებთან ერთად.

თუმცა, თქვენ ასევე უნდა იყოთ კარგი კომუნიკატორი და შეგეძლოთ მწერლობაც. აუცლებლად, გაითვალისწინეთ ექსპერტების რჩევები, თვენდავე სასარგებლოდ გამოგადგებათ მომავალში მსაჯობისას. თქვენ უნდა იყოთ გულწრფელები და კრიტიკულები, როცა საჭიროა არ შეგეშინდეთ თქვენი აზრის დაცვა ან სხვისი აზრის წინააღმდეგ წასვლა. უპირველეს ყოვლისა, იყავით ობიექტურები.

 

როგორია თქვენი მოლოდინი კავკასიის რეგიონის ღვინოებზე? და როგორ წარმოგიდგენიათ IWSC Wine Judging in Georgia-ს გავლენა ქართული ღვინის ინდუსტრიაზე?

საქართველოში კლიმატი ძალიან მრავალფეროვანია. მშრალი აღმოსავლეთი ერწყმის გრილ და ნოტიო დასავლეთს, რასაც ემატება კავკასიის მთების ჰავა და ათასობით მდინარე, ეს ყველაფერი ღვინის გასაოცარ გემოებს ქმნის. მე დარწმუნებული ქართული ღვინოს არ ექნება კლასიკური დასავლურ ევროპული გემო, ამიტომ ველოდები მარტივ თუმცა ავთენტურ გემოებს. ვფირობ ღვინოებს ექნებათ ალკოჰოლის მაღალი დონე და მკვეთრი სურნელი.

 

მელანია, თუ გავითვალისწინებთ საქართველოს ღვინის წარმოების მდიდარ 8000-წლიან ისტორიას, რას ელით ყველაზე მეტად საქართველოსგან?

საოცრად მხიბლავს კავშირი ღვინოსა და ისტორიას შორის. როგორც იტალიელი, ვაზის ბევრი ჯიში ვიცი, თუმცა მოუთმენლად ველი გავიცნო და დავაგემოვნო  500 ქართული ადგილობრივი ყურძნის ჯიშისგან წარმოებული ღვინოები, ასევე, ზოგადად,  გემოები კავკასიის რეგიონიდან.ასევე მე სიამოვნებით გავიცნობ ტრადიციულ ქვევრის ღვინოს.

 

საქართველო ამაყობს თავისი ღვინის მემკვიდრეობით, ადგილობრივი ექსპერტები და მოყვარულები აფასებენ თავიანთ ღვინოს. როგორ ემზადებით ქართველ მეღვინეებთან შესახვედრად და მათ ღვინოებში „ჩაძირვას“

მინდა სუფთა ფურცლიდან დავიწყო და მოვუსმინო, ვისწავლო ქართველი მეღვინეებისგან და ამით ჩემს ცოდნას რაიმე ახალი შევმატო. ჩემი სურვილია ვკითხო მათ, როგორ გამოიყურება ქართული ღვინის მომავალი, თუ სად ხედავენ თავიანთ თავებს. დიდი სიამოვნებით მოვისმენ ისტორიებს, თუ როგორ იტოვებენ ქართველი მეღვინეები ტრადიციული ქვევრის ტექნიკას უკან და ეძებენ ახალ მიმართულებებს, რათა დააკმაყოფილონ  საერთაშორისო საბაზრო მოთხოვნილებები.

 

ღვინის ინდუსტრიაში თქვენი დიდი ცოდნისა და გამოცდილების გათვალისწინებით, როგორ ფიქრობთ, რითი შეიძლებ ქართული ღვინო გამოირჩეოდეს სხვა ღვინოებისგან, რომელიც გაგისინჯავთ.

ქართული ღვინოები აღარ დგას ჩრდილქვეშ, როგორც ეს ადრე იყო, თუმცა, ჯერ კიდევ არ არის ისეთი პოპულარული, რომ მკაფიო წარმოდგენა გვქონდეს რეგიონის მიერ შემოთავაზებულ ზოგად მახასიათებლებზე. მე ვიცი, რომ მცირე ზომის საოჯახო მარნები შთამბეჭდავ ღვინოებს აწარმოებენ, ისინი ცდილობენ ტექნიკის მოდერნიზებას. შესაძლოა, სწორედ ამ მცირე მეწარმეებმა, რომლებსაც ჯერ არ ვიცნობთ, ყველაზე მეტად დაიმსახურონ მსაჯების  მოწონება.

 

ინტერვიუ  ღვინის მწერალთან და BBC Breakfast-ის და Channel 5 News-ის რედაქტორთან დეივიდ კერმოდთან, რომელიც IWSC Wine Judging in Georgia-ს ჟიურის წევრი იქნება.

დეივიდ, როგორ იმოქმედა თქვენმა გამოცდილებამ მედია სფეროში, მას შემდეგ, რაც პროფესია შეიცვალეთ და ჟურნალისტიკიდან ღვინის მწერლობაზე გადახვედით?

სანამ WSET დიპლომს ავიღებდი და კარიერას ღვინის ინდუსტრიას დავუკავშირებდი, ჩემი ცხოვრების ორი ათწლეული ნიუსრუმში დატვირთული გრაფიკით გავატარე. ასეთი გამოცდილება, ვგულისხმობ ტელევიზიასა და რადიოში ყოველდღე სიახლეების წამყვანად მუშაობას, მნიშვნელოვნად მეხმარება სწრაფად ავითვისო სიახლეები და მოვძებნო საინტერესო კავშირები ღვინოსთან. გეთანხმებით, რომ ღვინო ძალიან საინტერო თემაა და ბევრ პროფესიონალთან შემიძლია გაუთავებლად საუბარი, მაგრამ უპირველეს ყოვლისა უნდა გვახსოვდეს მომხმარებელი. ჩვენ უნდა დავანახოთ მათ ღვინის მშვენიერება, ისე, რომ მათთვის მარტივად აღსაქმელი და საინტერესო გახდეს. მაგალითად, თუ დარწმუნებული ხართ, რომ აუცილებლად საჭიროა ახსენოთ ტერმინი „მალოლაქტიკური დუღილი“, ახსენეთ, მაგრამ ისიც ახსენით, თუ რას ნიშნავს ან რატომაა მნიშვნელოვანი კონკრეტულ სიტუაციაში. მომხმარებელი ყოველთვის პირველ ადგილზე დგას!

როგორც IWSC-ს მსაჯი საქართველოში, რა უნიკალურ მახასიათებლებს ელით ქართული ღვინოებისგან და სად ხედავთ მათ პოზიციონირებას ღვინის მსოფლიო ინდუსტრიაში?

ყველას უყვარს ისტორია, საქართველო კი, როგორც ღვინის ცივილიზაციის აკვანი, მდიდარია ამ ისტორიით. საქართველო მდიდარი და მომხიბვლელი ტრადიციების მატარებელია, თუმცა მისი ღვინო ინოვაციური და განსხვავებულია. ტრადიციებისა და ინოვაციების ტანდემი კი თანამედროვე მომხმარებლისთვის მნიშვნელოვან როლს თამაშობს გადაწყვეტილების მიღების პროცესში. ქართული ღვინო ასევე კარგად ერწყმის კვების კულტურას, რომელზე მოთხოვნაც მსოფლიოში კიდევ უფრო იზრდება.

აღმოგიჩენიათ თუ არა განსაკუთრებული ტექნიკა ან ინოვაცია ღვინის წარმოებაში, რომელმაც მიიპყრო ყურადღება ან ფიქრობთ, რომ გარდამტეხი შეიძლება გახდეს ინდუსტრიისთვის?

ღვინის სამყარო გასაოცარია და მუდმივად ინოვაციებს გვთავაზობს. პროვანსში წარმოებული როზე რევოლუციის კარგი მაგალითია. ეს ბუნებრივიცაა, რადგან დიდი ყურადღებაა გამახვილებული მოსავლის პირობებზე, ტემპერატურის კონტროლზე, ტექნიკის სტაბილიზაციაზე და სხვა ფაქტორებზე. ასე რომ, დახვეწილი ტექნოლოგია ბრწყინვალედ შეიძლება შეერწყას  ტრადიციული მემკვიდრეობის მეთოდებსა და ტექნიკებს, რაც, რეალურად, ჩემი მოლოდინია საქართველოში.

საქართველო ამაყობს ღვინის წარმოების მდიდარი, 8000-წლიანი ისტორიით. თქვენ, როგორც პროფესიონალი, რომელიც ინტენსიურად შეისწავლის ღვინოსა და ალკოჰოლურ სასმელებს, როგორ აღიქვამთ ქართული ღვინოების მნიშვნელობას ღვინის გლობალურ ბაზარზე?

საქართველო ღვინის მწარმოებელი ერთ-ერთი პირველი ქვეყანაა, მისი ტექნიკა კი უნიკალურია. თქვენს ქვეყანას აქვს ადგილობრივი ყურძნის ჯიშები, რომლებიც აბსოლუტურად ერგება თანამედროვე ტენდენციებს, რაც ჩემთვის ძალიან სასიხარულოა.

თქვენ გაქვთ პრივილეგია, გაიცნოთ და დააგემოვნოთ ღვინოები მთელი მსოფლიოდან. თქვენი აზრით, რით განსხვავდება ქართული ღვინოები, თავისი ტრადიციული „ქვევრის“ მეღვინეობის მეთოდებით, თანამედროვე ღვინის წარმოების ტექნიკისგან?

ქვევრის ღვინო ძალიან გამორჩეულია, მაგრამ ხშირად მომხმარებლისთვის ნარინჯისფერ ღვინოსთან ასოცირდება. თვლიან, რომ გარკვეულწილად ის რთულად აღსაქმელია  და ზედმეტ ტანინს (ბუნებრივად შექმნილი ქიმიური ნივთიერება, რომელიც ღვინოს სიმძიმეს მატებს და პირის ღრუში სიმშრალის შეგრძნებას აჩენს) შეიცავს. რეალურად კი ქვევრის ღვინოს შეუძლია მომხმარებელს შესთავაზოს განსხვავებული, სრულიად თანამედროვე სტილის გემო, რომელიც ერწყმის ტრადიციებს.

როგორც ღვინის კონსულტანტი, ხედავთ თუ არა პოტენციურ თანამშრომლობას ქართველ მეღვინეებსა და ღვინის სხვა რეგიონებს შორის?

დიახ, რა თქმა უნდა. მიუხედავად იმისა, რომ დიდ ბრიტანეთში ღვინის ბაზარი საკმაოდ დატვირთულია, თანამედროვე მომხმარებლისთვის  ქართული ღვინო მაინც წარმოადგენს ინტერესის სფეროს.

გლობალურ მარკეტზე პოზიციების გასამყარებლად საჭიროა მსუყე პორტფელის შექმნა, სადაც გადამწყვეტი მნიშვნელობა ენიჭება ჯილდოებსა და კონკურსებს, რომელშიც მონაწილეობა მიუღიათ.

და ბოლოს, როგორც IWSC-ის კონკურსის მსაჯი საქართველოში, რა რჩევებს მისცემდით ქართველ მეღვინეებს, რომლებსაც სურთ თავიანთი კვალი დატოვონ საერთაშორისო ასპარეზზე?

პირველ რიგში, ქართველმა მეღვინეებმა უნდა ისწავლონ რა მოსწონს საერთაშორისო მომხმარებელს, ასევე ვურჩევდი, რომ იამაყონ თავიანთი კულტურით და იფიქრონ იმაზე, თუ როგორ განავითარონ ქართული საკვებისა და ღვინის კულტურის ისტორია. და ყოველთვის, ყოველთვის იმუშაონ ერთად, რადგან გუნდურობა წარმატების გარანტიაა.

 

გასული კონკურსის მნიშვნელობაზე და ქართველი მეღვინეებისთვის გაჩენილ შესაძლებლობებზე მარიამ გუჯაბიძე, IWSC Wine Judging in Georgia-ს ბრენდ ამბასადორი საუბრობს. 

შეგიძლიათ გაგვიზიაროთ შარშანდელი კონკურსის რამდენიმე მნიშვნელოვანი მოვლენა, რომელმაც დიდი შთაბეჭდილება მოახდინა თქვენზე?

შემიძლია ვთქვა, რომ ასეთ მოვლენათა წყება იყო კონკურსის დაანონსებიდან მის დასრულებამდე, თუმცა პირველი შთაბეჭდილება მაინც, რა თქმა უნდა, უშუალოდ დაკავშირებული იყო თვითონ იმ ფაქტთან, რომ ასეთი პრესტიჟული ღვინისა და ალკოჰოლური სასმელების საერთაშორისო კონკურსი საქართველოში ჩატარდებოდა.

International Wine & Spirit Competition არის კონკურსი რომელსაც აქვს ნახევარსაუკუნოვანი ისტორია და რომელიც მსოფლიოს მასშტაბით არის ერთ-ერთი ყველაზე პრესტიჟული და ავტორიტეტული, შესაბამისად ამ კონკურსის საქართველოში ჩატარება იყო ძალიან დიდი გამარჯვება ქართული ღვინის ინდუსტრიისთვის.

მნიშვნელოვანი და შთამბეჭდავი იყო ის მაღალი სტანდარტი, რომელთა სრული დაცვით განხორციელდა კონკურსის ყველა ეტაპი IWSC Wine judging in Georgia -ის გუნდის მიერ და რა თქმა უნდა, აუცილებლად უნდა გამოვყო დარეგისტრირებულ ღვინოთა უპრეცედენტო, რეკორდული რაოდენობა – 152-მა მწარმოებელმა წარმოადგინა 487 ღვინო. ასეთმა ინტერესმა და ჩართულობამ, ერთი მხრივ, უდიდესი შთაბეჭდილება მოახდინა და მეორე მხრივ, კიდევ ერთხელ დაგვარწმუნა კონკურსის ჩატარების აუცილებლობაში.

როგორ აღწერთ IWSC კონკურსზე ოქროს, ვერცხლის ან ბრინჯაოს მედლის მოპოვების მნიშვნელობას ქართული ღვინის მსოფლიო ასპარეზზე პოპულარიზაციის თვალსაზრისით?

კონკურსის საქართველოში ჩატარებით ქართული ღვინო კიდევ ერთხელ მოექცა მსოფლიო ღვინის საზოგადოების ყურადღების ეპიცენტრში. კონკურსის შედეგები გაშუქდა ავტორიტეტულ ღვინის გამოცემებში, კონკურსის შედეგებზე და აღმოჩენილ უნიკალურ ღვინოებზე წერდნენ კონკურსის მსოფლიო დონის, უმაღლესი რანგის პროფესიონალი ჟიურის წევრები. ყოველივე აღნიშნულმა განაპირობა როგორც ცალკეული მედალოსან ღვინოთა პოპულარიზაცია, ასევე, საქართველო, როგორც ღვინის სამშობლო მსოფლიო ღვინის რუკაზე კიდევ ერთხელ ღირსეულად წარმოჩინდა.

თქვენი აზრით, როგორ შეუწყო ხელი შარშანდელმა ღონისძიებამ ქართულ მეღვინეობებს საერთაშორისო აღიარებასა და რეპუტაციას მოპოვებას?

მნიშვნელოვანია აღინიშნოს, რომ პირველად ისტორიაში, ქართველ მწარმოებლებს ჰქონდათ უნიკალური შესაძლებლობა მოეპოვებინათ საერთაშორისოდ აღიარებული ჯილდო მათსავე ქვეყანაში და მოხარულები ვართ, რომ ეს შესაძლებლობა ბევრმა მათგანმა გამოიყენა. რაც შეეხება უშუალოდ გამარჯვებულ ღვინოებს, აქ უნდა გამოვყოთ ორი საკითხი, პირველ რიგში, რეპუტაციული, რომელიც პირდაპირ ბმაშია ღვინის გაყიდვების ზრდასთან. იყო IWSC-ის მედალოსანი, ეს უკვე აპრიორი საუბრობს ღვინის ხარისხზე და გემოვნურ თვისებებზე, რაც ნიშნავს იმას, რომ ღვინის მწარმოებლების მიერ პოტენციურ პარტნიორებთან თუ ბაიერებთან მოლაპარაკებების წარმოებისას მნიშვნელოვნად გაადვილებულია მათი მხრიდან გადაწყვეტილების მიღება თანამშრომლობასთან დაკავშირებით. კონკურსში გამარჯვება ეს არის გასაღები ახალ საექსპორტო ბაზრებზე და რა თქმა უნდა, უდიდესი პრესტიჟი, ამიტომ მედალოსანმა ღვინოებმა მოიპოვეს როგორც საერთაშორისო აღიარება, ასევე, ეს ჯილდო მათ დაეხმარათ საერთაშორისო ბაზარზე ექსპანსიაში.

როგორი გამოხმაურება (feedback) გქონდათ ღვინის ენთუზიასტებისგან გასული წლის კონკურსის შემდეგ?

ჩვენი გუნდისთვის უმნიშვნელოვანესი იყო ღვინის სფეროს წარმომადგენლების უკუკავშირი. ამ შემთხვევაში კი მინდა აუცილებლად გამოვყო, კონკურსში მონაწილე იმ მეღვინეების გამოხმაურება, რომლებმაც ვერ მოიპოვეს მედალი, თუმცა მიიღეს უდიდესი გამოცდილება. კონკურსის ერთ-ერთ მთავარ მიღწევად მიმაჩნია, ის ფაქტი, რომ რეალურად ყველა მონაწილე  მოგებული რჩება, ის მონაწილეებიც კი, რომლებმაც ვერ გაიმარჯვეს, რადგან ინდივიდუალურად მიიღეს ჟიურის წევრების შეფასებები საკონკურსო ღვინოებთან დაკავშირებით. არაერთმა მათგანმა აღნიშნა, თუ რამდენად მნიშვნელოვანი იყო მათთვის ეს შეფასებები, რასაც აუცილებლად გაითვალისწინებდნენ სამომავლოდ. ხოლო რაც შეეხება, ჩვენი პარტნიორების – IWSC-ის გუნდის შეფასებას, ის ფაქტი, რომ წელს კონკურსი საქართველოში კვლავაც ჩატარდება, მეტყველებს გასულ წელს ჩატარებული კონკურსის წარმატებაზე.

წლევანდელი კონკურსის მოახლოებასთან ერთად, რა მოლოდინი გაქვთ ღონისძიებაზე, როგორც ახალი მეღვინეობების მონაწილეობის, ასევე ინდუსტრიაზე გავლენის კუთხით?

რა თქმა უნდა მოლოდინები არის ძალიან დიდი, როგორც ორგანიზატორების, ასევე მონაწილეების და ზოგადად, ინდუსტრიის მხრიდან. იმისთვის, რომ ნათელი იყოს კონკურსის საქართველოში ჩატარების მნიშვნელობა, მარტივ სტატისტიკას მოვიყვან, ბოლო წლების განმავლობაში IWSC-მა საქართველოდან სულ 56 საკონკურსო ღვინო მიიღო, თუმცა მას შემდეგ რაც, კონკურსი ქვეყნის ფარგლებს შიგნით დაანონსდა, ეს რიცხვი 750%-ით გაიზარდა. ფაქტია, ინტერესიც და კონკურსის გავლენაც ინდუსტრიაზე ძალიან დიდია, წელს კი ჩვენს გუნდი და ჟიურის წევრები ველოდებით კიდევ უფრო მეტ ახალ და საინტერესო მეღვინეობებს და ღვინოებს.

და ბოლოს, რას ურჩევდით მეღვინეებს, რომლებიც მოუთმენლად ელიან წლევანდელ IWSC ღვინის კონკურსს საქართველოში?

აუცილებლად მიიღონ მონაწილეობა კონკურსში, რომელიც უფრო მეტია ვიდრე კონკურსი. IWSC  არის ღვინისა და ალკოჰოლური სასმელების საერთაშორისო საზოგადოება, რომელთა მიზანია არამარტო საუკეთესოების დაჯილდოებაა, არამედ აღმოუჩენელ ტალანტების აღმოჩენა, რისი დადასტურებაცაა შარშანდელ მედალოსანთა სია, სადაც გამარჯვებულთა შორის იყო ბევრი პატარა და საშუალო მარანი. ასე, რომ მეღვინეებს აუცილებლად ვურჩევ, რომ მისცენ მათ შემოქმედებას – ღვინოს, იმის შანსი რომ გახდეს მსოფლიოს ერთ-ერთი ყველაზე პრესტიჟული და ავტორიტეტული კონკურსის გამარჯვებული.

2022 წელს, „გურჯაანის ღვინის ფესტივალი“ ღვინის ეროვნული სააგენტოს მხარდაჭერით, უდიდესი მნიშნველობის მქონე საერთაშორისო ღვინისა და ალკოჰოლური სასმელების კონკურსის IWSC-ის ოფიციალური პარტნიორი გახდა და საქართველოში პირველად ჩატარდა IWSC Wine Judging in Georgia-ს კონკურსი, სადაც ქართულმა ღვინოებმა გლობალურად აღიარებული ჯილდოები დაიმსახურეს. წელს კი, ,,გურჯაანის ღვინის ფესტივალმა“ მოიპოვა კონკურსის ჩატარების სამწლიანი ლიცენზია.

IWSC-ის კონკურსის მნიშვნელობაზე ღვინის ეროვნული სააგენტოს თავჯდომარე, ლევან მეხუზლა გვესაუბრა. მან წინა წელი პოზიტიურად შეაფასა და აღნიშნა,  რომ კონკურსში მონაწილეობა მეღვინეებს აძლევს შესაძლებლობას, პოპულარული და ცნობადი გახადოს საკუთარი პროდუქცია, გაიფართოვოს კონტაქტები და ასევე გაეცნოს ღვინის მსოფლიო ბაზარზე არსებულ ზოგად ტენდენციებს.

-ბატონო ლევან, როგორ შეაფასებდით IWSC წინა წელს? რამდენად მნიშვნელოვანი იყო აღნიშნული კონკურსი ღვინის კომპანიებისთვის, მარნებისთვის და ზოგადად, სექტორისთვის?

– კონკურსი გასულ წელს საქართველოში პირველად გაიმართა. აღნიშნული ღონისძიება ამჟამად მსოფლიოში ერთ-ერთ საუკეთესო და პრესტიჟულ ღვინისა და ალკოჰოლური სასმელების კონკურსადაა მიჩნეული. კონკურსი 1969 წელს დაარსდა და მისი არსებობის ისტორიაში მეორედ, და ევროპაში პირველად, IWSC-ის დირექტორატის გადაწყვეტილებით, დაიშვა გამონაკლისი და ცალკეული ქვეყნის მასშტაბით (პირველი ჩატარდა სამხრეთ აფრიკაში) კონკურსი მხოლოდ ქართველი მეღვინეებისთვის ჩატარდა, რაც იყო დიდი აღიარება და შესაძლებლობა ქართველი მეღვინეებისთვის. კონკურსის ჟიურის ხელმძღვანელობდა ღვინის  ეროვნული სააგენტოს კონტრაქტორი და მსოფლიოში აღიარებული ღვინის მაგისტრი, სარა ებოტი, რაც ასევე მიუთითებს ამ კონკურსის მნიშვნელოვანებაზე. კონკურსზე დარეგისტრირებული იყო უპრეცენდენტოდ მაღალი რაოდენობის – 487 ნიმუში, საიდანაც ღვინოებმა 16 ოქრო, 63 ვერცხლი და 209 ბრინჯაო დაიმსახურეს. ქართველი მწარმოებლების მიერ საერთაშორისოდ აღიარებული ჯილდოს მოპოვება კომპანიების პროდუქციას ხდის ცნობადს და აძლევს მათ მოტივაციას, რომ აწარმოონ უფრო ხარისხიანი პროდუქცია, რაც მათთვის რეალიზაციის ზრდისა და წარმოების განვითარების აუცილებელი წინაპირობაა.

-რეგიონების ჩართულობაზე რომ მოგვიყვეთ: რა მოლოდინები გაქვთ და როგორი პოტენციალი აქვს რეგიონების მცირე და საშუალო მეღვინეებს წელს?

-კონკურსით დაინტერესება საქართველოს მეღვინეობის ყველა რეგიონიდან დიდი იყო, თუმცა, კახეთი, როგორც საქართველოს მეღვინეობის უმთავრესი რეგიონი გაცილებით ფართოდ იყო წარმოდგენილი. საქართველო გამოირჩევა ვაზის ჯიშების მრავალფეროვნებით და უნიკალურობით მთელი ქვეყნის მასშტაბით და შესაბამისად, ამ კონკურსში, მომავალშიც უნდა იყოს წარმოდგენილი მცირე და საშუალო მარნები საქართველოს მეღვინეობის ყველა რეგიონიდან.

-წელს რა რეკომენდაციები გექნებათ და რატომ უნდა მიიღონ მონაწილეობა ქართველმა მეღვინეებმა ამ კონკურსში?

-ზოგადად ნებისმიერი პრესტიჟული კონკურსი წარმოაჩენს ამა თუ იმ ქვეყნის მეღვინეობის დარგში არსებულ სურათს. საქართველო ღვინის სამშობლოა და ამავე დროს აქვს ექსპორტზე ორიენტირებული ღვინის განვითარებული ინდუსტრია. შესაბამისად, აღნიშნულ კონკურსში მონაწილეობა მეღვინეებს აძლევს შესაძლებლობას პოპულარული და ცნობადი გახადოს საკუთარი პროდუქცია და ასევე გაეცნოს ღვინის მსოფლიო ბაზარზე არსებულ ზოგად ტენდენციებს, მიიღოს შეფასებები ექსპერტებისგან და გაითვალისწინოს ისინი სამომავლოდ, რაც მათ დაეხმარება წინსვლასა და განვითარებაში. სანიმუშოდ მოვიყვან გასული წლის კონკურსის ჟიურის თავმჯდომარის, ბრიტანელი ღვინის მაგისტრის, სარა ებოტის შეფასებებს, რაც კიდევ ერთხელ ადასტურებს ღვინის სამშობლოში მსგავსი კონკურსების აუცილებლობას. სარა ებოტი: “კონკურსის მსვლელობისას დავრწმუნდი, რომ საქართველოს ამბიცია, რომ ის ოპერირებდეს საუკეთესო ღვინოების ბაზარზე, რეალობასთან ახლოსაა. ჩვენ გვსურს ქართული ღვინის მსოფლიო ღვინის საზოგადოებისთვის გაცნობა. მინდა აღვნიშნო, რომ კონკურსზე წარმოდგენილი იყო მრავალფეროვანი და მაღალი ხარისხის ქართული ღვინო. მედალოსანი ღვინოების ხარისხი და ტექნიკური დახვეწილობა ისეთივე იყო, როგორც ჩამოყალიბებულ ღვინის რეგიონებში: იტალია, ბრიტანეთი, ესპანეთი და სხვა. თქვენი ძალა სწორედ, ერთიანობასა და მრავალფეროვნებაშია.“

ცნობისთვის, International Wine & Spirit Competition (IWSC) კონკურსი 1969 წელს დაარსდა და  დღეს მსოფლიოში საუკეთესო ღვინოებისა და ალკოჰოლური სასმელების შეფასება-აღიარების ერთ-ერთი ყველაზე ავტორიტეტული და უძველესი კონკურსია.  საერთაშორისო კონკურსი ყოველწლიურად ტარდება ლონდონში, სადაც ათიათასობით ალკოჰოლური სასმელის ტესტირებას პროფესიონალი, საერთაშორისო კომპეტენციის მქონე მსაჯები ატარებენ.

IWSC Wine Judging in Georgia წინა წლის ოქტომბერში ჩატარდა და მონაწილეთა რაოდენობის მიხედვით რეკორდული იყო საქართველოში ჩატარებულ კონკურსებს შორის – 152-მა მწარმოებელმა 487 ღვინო წარმოადგინა.  IWSC-ის ლონდონის კონკურსმა საქართველოდან ბოლო წლებში სულ 56 საკონკურსო ღვინო მიიღო, თუმცა მას შემდეგ რაც, კონკურსი ქვეყნის შიგნით დაანონსდა, ეს რიცხვი 750%-ით გაიზარდა.

IWSC საქართველოში რიგით მეორე ღვინის საერთაშორისო კონკურსს გამართავს. ამის შესახებ განცხადება ორგანიზაციამ ვებგვერდზე გამოაქვეყნა,

„მოხარული ვართ, რომ 2024 წლის ღვინის საკონკურსო წელს მეღვინეობის აკვნიდან ვიწყებთ. ამ შემოდგომაზე ჩვენი საერთაშორისო ექსპერტები საქართველოში გაემგზავრებიან, რათა მსოფლიოს ღვინის უძველესი კულტურის რეგიონის ღვინოები შეაფასონ“, – ნათქვამია განცხადებაში.

მსოფლიო ღვინის რეგიონების მხარდაჭერის მიზნით, IWSC აგრძელებს საერთაშორისო კონკურსების ჩატარებას, რაც მწარმოებლებს უნიკალურ შესაძლებლობას აძლევს, წარმოაჩინონ თავიანთი ღვინოები ჟიურის წევრების, ინდუსტრიის საერთაშორისოდ აღიარებული, ავტორიტეტული  ექსპერტების წინაშე.

IWSC-ის 2024 წლის გლობალური დაჯილდოების სერია სიმბოლურად დაიწყება იქ, „სადაც ეს ყველაფერი დაიწყო“- რეგიონში, რომელიც ცნობილია როგორც ღვინის სამშობლო.

„საქართველოში IWSC-ის ღვინის კონკურსის შარშანდელი წარმატების შემდეგ, 500-ამდე საკონკურსო ღვინითა და 280-ზე მეტი მიღებული მედლით, ჩვენ მოუთმენლად ველით დაბრუნებას ამ გასაოცარ ქვეყანაში, რომელიც ცნობილია თავისი სტუმართმოყვარეობითა და ღვინის უნიკალური ტრადიციებით“, – წერია განცხადებაში.

აღსანიშნავია, რომ  წელს, გურჯაანის ღვინის ფესტივალთან და საქართველოს ღვინის ეროვნულ სააგენტოსთან პარტნიორობით, კონკურსი მნიშვნელოვან რეგიონულ ღონისძიებად გადაიქცევა, რაც ნიშნავს იმას, რომ საქართველოში წარმოებულ ღვინოებთან ერთად კონკურსზე სომხეთის და აზერბაიჯანის ღვინოებსაც შეაფასებენ.

„საქართველო და კავკასიის რეგიონი განთქმულია ადგილობრივი ჯიშის ყურძნითა და ღვინის უძველესი ტრადიციებით. დღესდღეობით, ღვინის ნამდვილი რენესანსი მსოფლიოს ამ ნაწილში ხდება, სადაც ბევრი დამოუკიდებელი მწარმოებელი უმაღლესი ხარისხის, გამოკვეთილი რეგიონალური იდენტობის ღვინოებს აწარმოებს. IWSC-ის საერთაშორისო კონკურსის საქართველოში ჩატარება, ქართველი მეღვინეებისა და ასევე აზერბაიჯანელი და სომეხი მწარმოებლების ნამუშევრების  წაარმოჩენა, საშუალებას მისცემს ადგილობრივ მეწარმეებს მიიღონ გლობალური აღიარება და გააცნონ თავი ბრიტანეთსა და მსოფლიოს,“- განაცხადა IWSC-ის აღმასრულებელმა დირექტორმა კრისტელ გიბერმა.

ჩვენს ექსპერტთა გუნდს, რომელიც საქართველოში მიემგზავრება, ჩვენი ჟიურის წევრი, ღვინის აღიარებული მაგისტრი ალისტერ კუპერი უხელმძღვანელებს. ალისტერს შეუერთდებიან საერთაშორისო და ადგილობრივი ჟიური, მათ შორის ღვინის ბაიერები, უფროსი სომელიეები და ღვინის კონსულტანტები.

IWSC 2024 Wine Judging in Georgia-ის მონაწილე მწარმოებლები ისარგებლებენ შემდეგი უპირატესობებით:

• მონაწილეობის ფასდაკლებული საფასური;
• მოსახერხებელი ადგილობრივი მიწოდება;
• ჯილდოს მფლობელი ღვინოების IWSC-ის გლობალური აუდიტორიის წინაშე წარდგენა;
• IWSC-ის 2024 წლის საკომუნიკაციო კამპანიებში ჩართვა;
• IWSC-ის საერთაშორისოდ აღიარებული ღვინის ჟიურის წევრებისგან მიღებული შეფასება;

IWSC 2024 Wine Judging in Georgia, 2023 წლის 28-30 ნოემბერს კახეთში გაიმართება, საზეიმო დაჯილდოებას საქართველო 1-ელ დეკემბერს უმასპინძლებს, ხოლო შედეგები გლობალური ბაზრებისთვის 4 დეკემბერს IWSC-ის საიტზე გამოცხადდება. რეგისტრაცია IWSC-ის ოფიციალურ ვებგვერდზე 2023 წლის 5 ოქტომბერს გაიხსნება.

IWSC მსოფლიოს უძველესი და ყველაზე პატივსაცემი ღვინისა და ალკოჰოლური სასმელების დაჯილდოების ორგანიზაციაა, რომელიც 1969 წელს დაარსდა. კონკურსი ცნობილია თავისი მკაცრი შეფასების სტანდარტებითა და საპატიო ჟიურის გუნდით, მათ შორის, მსოფლიოში ცნობილი ბაიერებით, უფროსი სომელიეებითა და ღვინის მაგისტრებით. ლონდონში ყოველწლიური კონკურსის გარდა, რომელიც მთელი მსოფლიოდან ათასობით ნამუშევარს იღებს, IWSC-ს რეგულარულად მიჰყავს თავის ექსპერტები ღვინის სხვადასხვა რეგიონში საერთაშორისო კონკურსებზე მეღვინეების შესაფასებლად.

2023 წლის პირველი მიღებული მედლების გამოცხადებით, IWSC სიამოვნებით გვიზიარებს იმ შედეგებს, რაც საქართველოში ღვინოების დეგუსტაციისას მიიღეს.

თბილისის  ღვინის ბირჟაზე, სადაც ორი დღის განმავლობაში აგემოვნებდნენ ჟიურის წევრები ქართულ ღვინოს, IWSC-ი მოხარულია გამოაცხადოს 2023 წლის მედლების პირველი შედეგები.

IWSC-ის ჟიურის წევრები, ქეთ ლომაქსი, მეგან კლარკი, მეგი მაკფერსონი და სალვატორე კასტანო შეუერთდნენ ქართველ ღვინის ექსპერტებს, რათა შეექმნათ „მსაჯთა ძლიერი კომბინაცია“, აცხადებს კონკურსის კომიტეტის წევრი და ღვინის მაგისტრი სარა ებოტი, რომელიც ხელმძღვანელობდა ტესტირების პროცესს.

„ეს თანამშრომლობა იყო უპრეცედენტო შესაძლებლობა ქართველი მწარმოებლებისთვის, რათა ისარგებლონ საერთაშორისოდ აღიარებული კონკურსით, რომელიც იმართება მათ მშობლიურ ქვეყანაში“, განაცხადა სარა ებოტმა.

ბოლო წლების განმავლობაში, IWSC-მა საქართველოდან სულ 56 საკონკურსე ღვინო მიიღო, თუმცა მას შემდეგ რაც, კონკურსი ქვეყნის ფარგლებს შიგნით დაანონსდა, ეს რიცხვი 750%-ით გაიზარდა. კონკურსზე თითქმის 500 ქართული ღვინო დარეგისტრირდა რაც ორჯერ აღემატებოდა მოსალოდნელ რაოდენობას.

ოქროს მედალი, IWSC-ის უმაღლესი ჯილდო, 16 მონაწილეს გადაეცა. გარდა ამისა ღვინის კომპანიები დაჯილდოვდნენ 63 ვერცხლის და 209 ბრინჯაოს მედლებით.

„ეს იყო ძალიან საინტერესო სესია. ღვინოების ხარისხი და მათი მრავალფეროვნება იყო  ამაღელვებელი. შედეგებში წარმოდგენილი ჯიშებისა და რეგიონების მრავალფეროვნება ასახავს ბოლო წლების განმავლობაში ქართული ღვინის ტრანსფორმაციას. ერთი დიდი სიამოვნება იყო ქართული ღვინის საუკეთესო ექსპერტებთან ერთად დეგუსტაცია,” აცხადებს სარა ებოტი.

“მოცემულ შედეგებში მართლაც შესანიშნავია დაჯილდოვებული ღვინოების მრავალფეროვნება. ძალიან საინტერესოა უფრო დელიკატური ღვინოების აღიარება დასავლეთის რეგიონიდან, ისევე როგორც აღმოსავლეთის უფრო ნაცნობი მდიდარი სტილის დანახვა. და ამდენი განსხვავებული ჯიშის წარმოება, ასეთი მაღალი ხარისხით. მიუხედავად იმისა, რომ ძირითადად ყურძნის ორი ჯიში დომინირებს სარგავ ჰექტარზე, ეს შედეგები ადასტურებს მწარმოებლების სწრაფვას, გაიზარდონ და განაახლონ მშობლიური ჯიშები.”

For English version click HERE

IWSC Wine Judging in Georgia-ს გამარჯვებულები ცნობილია.  კომპეტენტურმა ჟიურიმ მედალოსანი ქართული ღვინოები გამოავლინა.  კონკურსზე დარეგისტრირებული უპრეცენდენტოდ მაღალი რაოდენობის – 487 ქართული ღვინოდან მედალი 288 მათგანს გადაეცა.  16 ოქრო, 63 ვერცხლი და 209 ბრინჯაო! – პირველად ისტორიაში, ქართველმა მწარმოებლებმა საერთაშორისოდ აღიარებული ჯილდო საკუთრ ქვეყანაში მოიპოვეს.

კონკურსში წარმოდგენილი ღვინის ნიმუშები საერთაშორისო და ადგილობრივმა ჟიურიმ შეაფასა,  რომელსაც ბრიტანელი ღვინის მაგისტრი სარა ებოტი ხელმძღვანელობდა. ჟიურის შემადგენლობაში იყვნენ,  ღვინის ექსპერტები ქეთ ლომაქსი, მეგან კლარკი, მეგი მაკფერსონი და კრისტელ გილბერტი, უფროსი სომელიე სალვატორე კასტანო. წარმოდგენილ ღვინის ნიმუშებს IWSC-ის ჟიურის ადგილობრივი მსაჯებიც აფასებდნენ. ჟიურის შემადგენლობაში ანა გოდაბრელიძე, გიორგი დაქიშვილი, ლადო უზუნაშვილი, დავით ჩიჩუა,  ჯაბა ძიმისტარიშვილი, მაგდა სურგულაძე,  პატრიკ ჰონეფი, გიორგი სამანიშვილი, შალვა ჯაფარიძე, რეზი ცეცხლაძე, ზვიად ლოლაძე, კახა ჭოტიაშვილი, ირაკლი ჩოლობარგია  და ღვინის ეროვნული სააგენტოს თავმჯდომარე ლევან მეხუზლა შედიოდნენ.

„საქართველოს პირველად 10 წლის წინ ვესტუმრე, ქართულმა ღვინომ ჩამოსვლისთანავე დაიპყრო ჩემი გული, რადგან ის სავსეა შინაარსით, რომელიც ქართულ კულტურულ მემკვიდრეობას გადმოსცემს. წლებია ვაკვირდები, რომ ქართული ღვინის ხარისხი და რაოდენობა ყოველწლიურად იზრდება. მე ბრიტანეთში ვახდენ ქართული ღვინის პოპულარიზაციას. 2017 წელს ღვინის ეროვნულმა სააგენტომ დაიწყო ინვესტიცია ბრიტანეთში, რამაც 10-ჯერ გაზარდა ქართული ღვინის ექპორტის რაოდენობა. სააგენტო აძლევს ქართულ ღვინოს პოპულარიზაციის შანსს.

კონკურსის მსვლელობისას დავრწმუნდი, რომ საქართველოს ამბიცია, რომ ის ოპერირებდეს საუკეთესო ღვინოების ბაზარზე, რეალობასთან ახლოსაა. ჩვენ გვსურს ქართული ღვინის მსოფლიო ღვინის საზოგადოებისთვის გაცნობა. მინდა აღვნიშნო, რომ კონკურსზე წარმოდგენილი იყო მრავალფეროვანი და მაღალი ხარისხის ქართული ღვინო. მედალოსანი ღვინოების ხარისხი და ტექნიკური დახვეწილობა  ისეთივე იყო, როგორც ჩამოყალიბებულ ღვინის რეგიონებში: იტალია, ბრიტანეთი, ესპანეთი და სხვა. თქვენი ძალა სწორედ,  ერთიანობასა და მრავალფეროვნებაშია,“ – აღნიშნა სარა ებოტმა.

მნიშვნელოვანია, რომ კონკურსის ფარგლებში ქართველ მეღვინეებს გამორჩეულმა ბრიტანელმა ექსპერტებმა საკუთარ გამოცდილება გაუზიარეს – იმისათვის, რომ სწორად შეფასდეს  ღვინო და გამოიკვეთოს  მისი ნამდვილი ღირებულება, საკმარისი დრო უნდა დაეთმოს მის გასინჯვას – დაგემოვნებას. ექსპერტთა თქმით, IWSC-ის ჯილდოს მიღება მარტივი ნამდვილად  არ არის და სწორედ ეს ფაქტი ანიჭებს  ჯილდოს მნიშვნელობას.  კონკურსს ჰყავს  გამარჯვებულები, თუმცა ყველა მონაწილე კი – მოგებული დარჩა, რადგან ჟიურის წევრებისგან  ყველა მონაწილეს ინდივიდუალური შეფასებები ელის.

„ქვეყნის ფარგლებში საერთაშორისოდ აღიარებულ კონკურსში მონაწილეობის მიღება ეს არის უნიკალური შესაძლებლობა და უპრეცენდენტო შანსი ქართველი მეღვინეებისთვის, განსაკუთრებით მცირე და საშუალო ზომის მარნებისთვის. კონკურსის მნიშვნელობა აისახა სწორედ იმ აქტივობაში, რაც დაფიქსირდა რეგისტრაციისას. IWSC-ის მიერ შეფასებულ ღვინოებს უყურებს მთელი მსოფლიო, მათ შორის, სხვადასხვა ქვეყნის ბაიერები. კონკურსის შედეგებმა კიდევ ერთხელ დაგვანახა, რომ ბოლო წლებში ქართული ღვინო იმკვიდრებს თავის ადგილს საერთაშორისო ბაზრებზე, ჩვენ გვჭირდება კიდევ ბევრი საერთაშორისო დონის კონკურსი და კიდევ მეტი წარმატება,“ – კონკურსის მნიშვნელობასა და ქართული ღვინის  წარმატებაზე საუბრობს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი.

„კონკურსი წარმატებით ჩატარდა. განსაკუთრებით აქტიურობდნენ მცირე და საშუალო ზომის მარნები. საკმაოდ მაღალი ხარისხის ღვინოები იყო წარმოდგენილი და მრავალი მათგანი ნამდვილად გამორჩეული იყო. ეს შესაბამისად, შედეგზეც აისახა. ჟიურის, რომელიც ქართულ ღვინოს აფასებდა მსოფლიო დონის მეღვინეები, სომელიეები და ბაიერები წარმოადგენდნენ. ამ დონის კონკურსის საქართველოში ჩატარება, ხელს შეუწყობს ქართული ღვინის ცნობადობის ამაღლებასა და საერთაშორისო ასპარეზზე გასვლას. მედალოსანი ღვინო კი, წინ გადადგმული ნაბიჯია ნებისმიერი ქართველი მეღვინესთვის, რომელიც ცდილობს, ევროპისა და მსოფლიოს მასშტაბით გაყიდვები გაზარდოს,“ – განმარტავს ღვინის ეროვნული სააგენტოს თავმჯდომარე ლევან მეხუზლა.

“საწნახელის” კახა ჭოტიაშვილი, მეღვინე აღნიშნავს, რომ ძალიან მნიშვნელოვანია ასეთი შეჯიბრებები საქართველოში: “პირველ რიგში, ძალიან მიხარია, რომ ასეთი დონის კონკურსები უკვე საქართველოში ტარდება, ეს ძალიან დიდ შანსს აძლევს მეწარმეებს და განსაკუთრებით ისეთ პატარა მარნებს, როგორიც ჩვენ ვართ. ეს შანსია, რომ ქართული მეღვინეობისა და მარნების შესახებ მთელმა მსოფლიომ გაიგოს”.

საქართველოში ღვინის საერთაშორისო კონკურსის International Wine & Spirit Competition (IWSC) ოფიციალური პარტნიორია გურჯაანის ღვინის ფესტივალი, ხოლო კონკურსის მხარდამჭერები არიან ღვინის ეროვნული სააგენტო და ღვინის დღეები საქართველოში.

საქართველოში ვიზიტის წინ, სერდარ ბალკაია “67 Pall Mall”-ის მთავარი სომელიე გვიზიარებს თავის მოსაზრებებს ქართულ ღვინოსთან დაკავშირებით.

რამდენად მნიშვნელოვანია სომელიესთვის ღვინის რეგიონებში მოგზაურობა, ნამდვილ მეღვინეებთან შეხვედრა თუ ჩვენ ისეთ სამყაროში ვცხოვრობთ, სადაც დისტანციურად შეგვიძლია შევისწავლოთ ყველაფერი?

ძალიან მნიშვნელოვანი… ჩემი მოკრძალებული აზით, სომელიეები და ღვინის მწარმოებლები უნდა ხვდებოდნენ ერთმანეთს მაქსიმალურად ხშირად. თუ ეს შეკრება იქნება ვენახში ან მეღვინეობაში, ეს ამ გამოცდილებას უფრო უნიკალურს გახდის. „ადგილის შეგრძნება“ ღვინის სამყაროს მნიშვნელოვანი ელემენტია.

რა როლი აქვს ღვინის ტურიზმს ღვინის პოპულარიზაციაში?

მჯერა, რომ ღვინის ტურიზმი ეხმარება ღვინის რეგიონებს მოიპოვონ მსოფლიო აღიარება. დანახვა, შეგრძნება, გამოცდილება ღვინით სიამოვნებისთვის გადამწყვეტი ნაწილია. იმ ხალხის გაცნობა, ვინც ღვინოს აკეთებს, მათი ვენახების ნახვა, რეგიონის ექსპერტებისგან ინფორმაციის მიღება ქმნის გამოცდილებას, რომელიც ცხოვრების ბოლომდე გაგყვება და რეგიონებსაც ეხმარება, რომ მსოფლიომ ისინი გაიცნოს სიტყვით, სოციალური ქსელით და სხვა გზებით.

რა არის მთავარი უნარი, რომელიც სომელიეებს სჭირდებათ ღვინის კონკურსებში გამოსაყენებლად?

თავმდაბლობა, დეგუსტაციის კარგი უნარები, კომპეტენტურობა.

კითხვები, რომლებსაც დაუსმევდით იმ მომხარებელს, რომელმაც არაფერი იცის ღვინის შესახებ.

რა სასმელს მიირთმევთ, გარდა ღვინისა?

რა გემოები და არომატები მოგწონთ?

რძის დალევა გირჩევნიათ თუ ვაშლის წვენის?

მშრალი თუ ტკბილი?

საქართველოში ვიზიტის წინ, სალვატორე კასტანო “Friarwood Wine Importers”-ის სავაჭრო მრჩეველი და მთავარი სომელიე გვიზიარებს თავის მოსაზრებებს ქართულ ღვინოსთან დაკავშირებით.

რისი პოვნა გსურთ ღვინის შეფასების დროს? რას აქცევთ ყურადღებას ღვინის შეფასების დროს?

ღვინის შეფასების დროს ბევრი რამ არის გასათვალისწინებელი: ფერი,  გემოს ინტენსივობა, სურნელი და გემოს ბალანსი.

რამდენად მნიშვნელოვანია სომელიესთვის ღვინის რეგიონებში მოგზაურობა, მეღვინეებთან შეხვედრა თუ ჩვენ ისეთ სამყაროში ვცხოვრობთ, სადაც დისტანციურად შეგვიძლია ვისწავლოთ ყველაფერი?

სომელიესთვის მოგზაურობა აუცილებელია. შეგიძლია ისწავლო იმდენი, რამდენიც გსურს, მაგრამ ღვინის რეგიონებში მოგზაურობა და ადგილობრივი ადამიანების გაცნობა, რომლებიც იმაზე კარგად იცნობენ გარემოს, ვიდრე ამის წაკითხვა რომელიმე წიგნში შეგიძლია, საუკეთესო გამოცდილებაა. ყოველ ჯერზე ღვინის ქარხანაში სტუმრობისას უფრო მეტს ვსწავლობ, ვიდრე წიგნებიდან.

რა როლი აქვს ღვინის ტურიზმს მის პოპულარიზაციაში?

დღეს ღვინის ტურიზმი უფრო და უფრო მეტ მნიშვნელობას იძენს, არამხოლოდ პროფესიონალი სომელიეებისთვის, რომლებსაც სურთ ახალი რეგიონების აღმოჩენა,  არამედ იმ ადამიანებისათვისაც, რომლებსაც უყვართ ღვინის დაგემოვნება და სულ უფრო მეტად ინტერესდებიან ღვინის რეგიონებში სტუმრობით.

რა არის ის მთავარი უნარი, რომელიც სომელიეს სჭირდება ღვინის კონკურსში მონაწილეობის მისაღებად?

ერთ-ერთი ყველაზე მნიშვნელოვანი უნარია გამოცდილება. როდესაც ძალიან ბევრი ღვინო გაქვს დაგემოვნებული, უკვე იცი რა უნდა ეძებო ახალ ღვინოში და რა აქცევს მას გამორჩეულად. აუცილებელია ვარჯიშიც, რათა თქვენი ცხვირი და სასა ყოველთვის მზად იყოს. ჩემი აზრით, „ბრმა დეგუსტაცია“ არის ერთ-ერთი საუკეთესო გზა იმ ღვინის ხარისხის გამოსაცნობად, რომელსაც აგემოვნებ.

კითხვები, რომლებსაც დაუსმევდით იმ მომხარებელს, რომელმაც არაფერი იცის ღვინის შესახებ.

როგორც წესი, ჩემი შეკითხვები ასეთია:

ხილის ღვინოები უფრო მოგწონთ თუ მშრალი?

მსუბუქი ღვინოები უფრო მოგწონთ თუ ტანინიანი?

მარტივად დასალევი ღვინოები უფრო მოგწონთ თუ კომპლექსური გემოთი?

ამ სამი კითხვით შეგიძლია გაიგო, თქვენს მომხმარებელს რომელი ღვინოს ანიჭებს უპირატესობას.