ქართველ მეღვინეებს მემკვიდრეობის შენარჩუნება შეუძლიათ ადგილობრივი ჯიშებისა და ქვევრის ტრადიციული მეთოდებისადმი ერთგულებასთან ერთად, თანამედროვე ტექნიკის გამოყენებით
ინტერვიუ უფროს სომელიესთან, სალვატორე კასტანოსთან.
სალვატორე, უკვე მეოთხედ ხართ საქართველოში IWSC-ის ღვინისა და სპირტიანი სასმლის კონკურსის ჟიური. რა არის ის, რის გამოც ყოველ წელს ბრუნდებით და როგორ შეიცვალა ქართული მეღვინეობა თქვენს აზრით ამ წლების განმავლობაში?
ის, რაც ყოველთვის მაბრუნებს, არის ქართველ მეღვინეთა ენთუზიაზმი და სტუმართმოყვარეობა. ყოველ წელს უფრო მეტ სიახლეს და თავდაჯერებულობას ვხედავ – მეღვინეები აერთიანებენ ტრადიციასა და თანამედროვე ტექნიკებს, ხარისხი კი უწყვეტად იზრდება.
თქვენი კარიერა სტუმართმასპინძლობისა და მაღალი დონის რესტორნების სფეროში დაიწყო. როგორ ფიქრობთ, როგორ აისახება საკუთარი ღვინის გაზიარებისა და წარმოჩენის პროცესში ქართული სტუმართმოყვარეობა და ღვინის კულტურა?
ქართული სტუმართმოყვარეობა სითბოს და გულუხვობას ეფუძნება, რაც ყოველთვის ჩანს ღვინის კულტურაშიც. საქართველოში ღვინის წარდგენა პირად გამოცდილებას ჰგავს და გულისხმობს კავშირს, ტრადიციასა და სურვილს, რომ სტუმარს თავი ოჯახის წევრად აგრძნობინო.
ქართული ღვინის ტრადიცია ერთ-ერთი უძველესია მსოფლიოში. თქვენი პროფესიული ხედვით, როგორ შეუძლიათ ქართველ მეღვინეებს შეინარჩუნონ ეს უძველესი მემკვიდრეობა და ამავდროულად იყვნენ ინოვაციურები, რათა თანამედროვე ბაზრის მოლოდინები დააკმაყოფილონ?
ქართველ მეღვინეებს მემკვიდრეობის შენარჩუნება შეუძლიათ ადგილობრივი ჯიშებისა და ქვევრის ტრადიციული მეთოდებისადმი ერთგულებასთან ერთად, თანამედროვე ტექნიკის გამოყენებით. ეს ავთენტურობის და ინოვაციის შერწყმაა – გზა, რომელიც ღვინოს უნიკალურობას უნარჩუნებს, მაგრამ გლობალური,თანამედროვე ბაზრისთვის მიმზიდველსაც ხდის.
თქვენ ხშირად აღნიშნავთ, რომ ღვინო მხოლოდ ტექნიკური კი არა, არამედ ემოციური გამოცდილებაცაა. რა ემოციებს აღძრავს თქვენში ქართული ღვინო?
ქართული ღვინო ჩემთვის სითბოს, გულწრფელობისა და უკვდავი ტრადიციის განცდას იწვევს. თითოეული ჭიქა თითქოს ჰყვება ისტორიას, რომელიც სავსეა მემკვიდრეობით, სიყვარულით და იმ გულუხვი სულით, რომელიც საქართველოს გამოარჩევს. ყოველ წვეთში იგრძნობა ნაცნობი განცდა, რომელიც თავს შინ გაგრძნობინებს.